Grand Theft Auto V
.svg){kind=small}
«Grand Theft Auto V» (կրճատ՝ «GTA 5»), 2013 թվականին «Rockstar North» ստուդիայի կողմից մշակված և «Rockstar Games» ընկերության կողմից թողարկված էքշըն և բաց աշխարհ ժանրերի համակարգչային խաղ։ Խաղը թվով տասնհինգերորդն է «Grand Theft Auto» խաղաշարերի մեջ[15]։ Պաշտոնապես լույս է տեսել 2013 թվականի սեպտեմբերի 17-ին՝ «Xbox 360» և «PlayStation 3» խաղային ապարատների համար։
Դեպքերը տեղի են ունենում Լոս Սանտոս գեղարվեստական քաղաքում, որն ստեղծված է Լոս Անջելեսի նախատիպով և առկա էր «GTA San Andreas» խաղում։ Օգտագործողն այս տարբերակում հնարավորություն է ստանում բացահայտելու գեղարվեստական մեգապոլիսի վայրերը, ինչպես նաև այցելել այլ վայրեր, որոնք գտնվում են Լոս Սանտոսից դուրս։ Սցենարային գործողությունները տեղի են ունենում միանգամից երեք խաղացվող կերպարի շուրջ, ինչը նորամուծություն է խաղաշարերի պատմության մեջ։ Օգտագործողը կարող է մի հերոսի սցենարից անմիջապես անցնել մյուսի սցենարին (եթե չի գտնվում առաքելության մեջ)։
Պաշտոնական թողարկումից 24 ժամ անց խաղի վաճառքն արդեն կազմել էր 800 միլիոն ԱՄՆ դոլար, իսկ առաջին 3 օրվա ընթացքում այն հատեց 1 միլիարդ դոլարի սահմանագիծը՝ խաղը դարձնելով պատմության մեջ ամենաարագ վաճառվող ժամանցային ապրանքատեսակը[16]։
Սյուժե
[խմբագրել | խմբագրել կոդը]2004 թվական, Լյուդենդորֆ, Հյուսիսային Յանկտոն։ Պրոֆեսիոնալ ավազակներ և լավագույն ընկերներ Մայքլ Թաունլին, Թրևոր Ֆիլիպսը և Բրեդ Սնայդերը զինված հարձակում են գործում տեղական բանկի վրա։ Կողոպուտը հաջողվում է, սակայն հեռանալիս մեքենան վթարի է ենթարկվում, և հերոսները ստիպված են լինում փախչել ոտքով։ Բրեդն ու Մայքլը հրազենային վիրավորում են ստանում Դաշնային hետաքննությունների բյուրոյի (Հետաքննությունների դաշնային բյուրոյի խաղային ադապտացիան) գործակալ Դեյվ Նորթոնի կողմից։ Թրևորին հաջողվում է փախչել։
Ավելի ուշ պարզվում է, որ հրաձգության ժամանակ վիրավորված Մայքլը, ազատազրկումից խուսափելու համար, գաղտնի համաձայնության է գալիս գործակալ Նորթոնի հետ, բեմադրում սեփական մահը և վկաների պաշտպանության ծրագրի շրջանակում ընտանյոք հանդերձ տեղափոխվում Լոս Սանտոս և սկսում հանդես գալ Դե Սանտա ազգանվամբ։
Անփառունակ կողոպուտից անցնում է 9 տարի։ Մայքլն անընդատ լարված հարաբերությունների մեջ է ընտանիքի անդամների հետ։ Նա հաճախում է հոգեբան Այզեա Ֆրիդլանդերի անհատական խորհրդատվություններին, ով, նրա կարծիքով, ամենևին էլ չի օգնում։ Գանգստեր Ֆրենկլին Քլինթոնը, ով իր ընկեր Լամար Դեյվիսի հետ աշխատում էր ամերիկահ��յ խարդախ մեքենավաճառ Սիմեոն Եթարյանի մոտ, պատահաբար առերեսվում է Մայքլին, երբ փորձում էր խաբեությամբ գողանալ իր որդու՝ սրահից ձեռք բերված մեքենան։ Հետագայում Մայքլն ու Ֆրենկլինը մտերմանում են։ Երբ մի անգամ Մայքլը տուն վերադառնալիս ննջասենյակում կնոջը բռնացնում է թենիսի մարզչի հետ, նա Ֆրենկլինի հետ հետապնդում է մարզչին, ի վերջո գետնին հավասերեցնելով նրա առանձնատունը։ Առանձնատան սեփականատերը՝ նարկոբարոն Մարտին Մադրազոն, փոխհատուցում է պահանջում
Գումարը հայթայթելու համար Մայքլը ստիպված է լինում վերադառնալ իր հանցավոր անցյալին, որպես հանցակից ներգրավելով նաև Ֆրենկլինին։ Մայքլի հին ընկեր հաշմանդամ հաքեր Լեստեր Քրեստի օգնությամբ նրանք թալանում են ոսկերչական խանութը, ինչից ստացված գողոնը բավարար է լինում պարտքը մարելու համար։ Միևնույն ժամանակ, Թրևորը, ով հակահիգենիկ պայմաններում ապրում է Բլեյն շրջանի փոքր բնակավայրերից մեկում, նորություններից տեղեկանում է խանութի կողոպուտի մասին և, նշմարելով վաղեմի ընկերոջ ձեռագիրը, սկսում կասկածել երբեմնի Մայքլ Թաունլիի սպանության ճշմարտացիության շուրջ։ Ի վերջո, Թրևորին հաջողվում է հայտնաբերել Մայքլին և վերամիավորվել նրա հետ, թեև վերջինս դրան պատրաստ չէր։
Ժամանակի ընթացքում Մայքլի, Թրևորի և Ֆրենկլինի վարած կյանքը դուրս է գալիս վերահսկողությունից։ Հանցավոր կյանք վերադառնալու պատճառով ընտանիքը լքում է Մայքլին։ Երբ նա հետագայում դառնում է կինոպրոդյուսեր, նա կոնֆլիկտի մեջ է մտնում միլիարդատեր և ագրեսիվ վենչուրային կապիտալիստ Դևին Ուեսթոնի հետ, ով փորձում է փակել Մայքլի ստուդիան։ Մայքլը կարողանում է խափանել Ուեսթոնի ծրագրերը, սակայն միևնույն ժամանակ պատասխանատու է դառնում Ուեսթոնի օգնականի անզգույշ մահվան մեջ՝ ստիպելով Դևինին վրեժխնդիր լինել։ Միևնույն ժամանակ, Ֆրենկլինը պետք է փրկի իր ընկեր Լամար Դեյվիսին իր նախկին ընկերոջ և մրցակից գանգստեր Հարոլդ «Սթրեթչ» Ջոզեֆից, ով փորձում էր սպանել նրանց, որպեսզի կարողանա միանալ Բալաների հանցախմբին։ Միևնույն ժամանակ, Թրևորը փորձում է ամրապնդել իր դիրքերը Բլեյն շրջանի տարբեր սև շուկաների վրա՝ մի քանի ճակատով պատերազմ մղելով «Կորուսյալներ» բայքերական ակումբի, լատինաամերիկյան փողոցային ավազակախմբերի, մրցակից մեթամֆետամինադիլերների, «Մերիվեդեր» մասնավոր անվտանգության ընկերության և չինական տրիադների պարագլուխ Վեյ Չենգի դեմ։
Կրկին կողոպուտի մասնակցելով Մայքլը խախտել էր գործակալ Դեյվ Նորթոնի հետ իր համաձայնությունը, ուստի Դեյվը և վերջինիս վերադաս Սթիվ Հեյնսը ստիպում են Մայքլին, Ֆրենկլինին և Թրևորին մի շարք գախտնի օպերացիաներ կատարել Միջազգային հարաբերությունների գործակալության (Կենտրոնական հետախուզական վարչության խաղային ադապտացիան) համար։ Սթիվի ղեկավարությամբ և Լեստերի հսկողությամբ եռյակը հարձակվում է գործակալության դրամական միջոցները տեղափոխող ավտոշարասյան վրա և կողոպտում փորձարարական քիմիական զենք գործակալության լաբորատորիայից։ Քանի որ Սթիվը սկսում է հայտնվել անվտանգության ծառայությունների հետաքրքրության շրջանակում, նա ստիպում է Մայքլին և Ֆրենկլինին ջնջել իր դեմ ապացույցները Դաշնային hետաքննությունների բյուրոյի սերվերներից։ Առիթից օգտվելով, Մայքլը կարողանում է ջնջել նաև իր տվյալները բազայից, այդ կերպ մեկընդմիշտ զրոյացնելով Սթիվի լծակները նրա հանդեպ։
Ընտանիքի հետ հաշտվելուց հետո Մայքլը Թրևորի, Ֆրենկլինի և Լեստերի հետ սկսում է պլանավորել իր վերջին կողոպուտը։ Դարակազմիկ կողոպուտի առարկան այս անգամ պետք է լիներ դաշնային գանձատան ոսկու ձուլակտորների պահուստը։ Այնուամենայնիվ, Թրևորը հայտնաբերում է, որ Լյուդենդորֆի կողոպուտից ի վեր Բրեդը ոչ թե բանտարված է, ինչպես նա գիտեր, այլ սպանված և թաղված Մայքլի համար նշված գերեզմանում։ Ենաթադրելով, որ Բրեդի փոխարեն իրեն պետք է սպանեին, Թրևորն իրեն դավաճանված է զգում։ Գերեզմանոցում Մայքլի հետ առերեսվելիս, Թրևորը նկատում է նրանց մոտեցող Չենգի բանդայի անդամներին և Մայքլին մենակ թողնում նրանց հետ հրաձգության ժամանակ։ Միևնույն ժամանակ, Սթիվը դավաճանում է Մայքլին ու Դեյվին, ինչի պատճառով նրանց հանդիպման վայրում են հայտնվում ԴՀԲ-ի, ՄՀԳ-ի և նույնիսկ՝ «Մերիվեդեր» մասնավոր անվտանգության ուժայինները։ Սկսվում է լարված հրաձգություն։ Թրևորն օգնում է Մայքլին և Դեյվին, պնդելով, որ միայն նա բարոյական իրավունք ուներ սպանել Մայքլին՝ համաձայնելով վերջինիս հետ կատարել դաշնային գանձատան կողոպուտը և դրանից հետո բաժանվել։
Կողոպուտը պսակվում է հաջողությամբ, սակայն շատ չանցած Ֆրենկլինին են մոտենում Սթիվը և Դեյվը, ովքեր պնդում են, որ Թրևորն անկայուն մարդ է և պետք է ոչնչացվի։ Ավելի ուշ Ֆրենկլինին է այցելում Դևին Ուեսթոնը, ով իր հերթին պնդում է, որ պետք է Մայքլը սպանվի։ Ֆրանկլինն ունի երեք ընտրություն՝ սպանել Թրևորին, սպանել Մայքլին կամ ռիսկի դիմել և փորձել փրկել երկուսին էլ։ Մայքլին կամ Թրևորին սպանելու դեպքում, Ֆրենկլինը դադարեցնում է կապն այն մարդու հետ, ում կյանքը խնայում է և վերադառնում է իր հին կյանքին։ Երրորդ տարբերակի դեպքում, Մայքլն ու Թրևորը հաշտվում են, և եռյակը, Լամարի և Լեստերի աջակցությամբ, դիմակայում են ԴՀԲ-ի և «Մերիվեդերի» հարձակմանը, նախքան Չենգին, Սթրեթչին, Սթիվին և Դևինին ոչնչացնելը։ Երեք հերոսները դադարում են միասին աշխատել, սակայն մնում են ընկերներ։
Ծանոթագրություններ
[խմբագրել | խմբագրել կոդը]- ↑ 1,0 1,1 1,2 1,3 1,4 Steam — 2003.
- ↑ PlayStation Store
- ↑ Grand Theft Auto V: Premium Edition — 2012.
- ↑ Humble Store
- ↑ https://web.archive.org/web/20130718101703/http://www.computerandvideogames.com/419205/gta-5-new-details-japanese-release-date-confirmed
- ↑ Digioia A. GTA V per PS5 e Xbox Series X/S uscirà il 15 marzo: Rockstar svela i dettagli della versione next-gen: Nuove informazioni anche sulla versione standalone di GTA Online // IGN — San Francisco: 2022.
- ↑ GTAV Title Update 1.54 Notes (PS4 / Xbox One / PC)
- ↑ Actualización 1.36 de GTAV (solo PS3) (իսպ.)
- ↑ GTAV Title Update 1.29 Notes (PS3/Xbox 360)
- ↑ https://web.archive.org/web/20211215090225/https://www.gtabase.com/news/grand-theft-auto-v/title-updates/gta-online-the-contract-update-december-2021-patch-notes-fixers
- ↑ http://store.steampowered.com/app/271590/Grand_Theft_Auto_V/
- ↑ Internet Movie Database — 1990.
- ↑ https://pegi.info/search-pegi?q=grand+theft+auto+v
- ↑ 14,0 14,1 https://usk.de/?s=Grand+Theft+Auto+V
- ↑ Ստաֆ Ռայթեր (2011 թ․ նոյեմբերի 2). «Համացանցում հայտնվել է «GTA V»-ի թրեյլերը» (անգլերեն). «Այ Թի ՊրոՊորտալ». Արխիվացված օրիգինալից 2012 թ․ նոյեմբերի 23-ին. Վերցված է 2012 թ․ հունիսի 13-ին.
- ↑ Բաքլի, Շոն (2013 թ․ սեպտեմբերի 16). ««GTA V»-ի վաճառքը երեք օրվա ընթացքում հասել է $1 միլիարդի, այն կարող է դառնալ ամենաարագ վաճառվող ժամանցային ապրանքատեսակը պատմության մեջ». Engadget.com. Վերցված է 2013 թ․ սեպտեմբերի 22–ին-ին.